خبرونهژورنالیزم

د خورشید ټلویزیون پر کارکوونکو برید غندل سوی

د افغانستان حکومت په کابل کې د خصوصي ټلوېزیون، خورشید پر کارکونکو برید وغانده.

د کابل د کلوله پشتې پر څلور لارې پرون (۱۳۹۹د غبرګولی ۱۱مه) مازدیګر د مقناطیسي ماین په چاودنه کې د خورشید ټلوېزیون یو خبریال او یو تخنیکي کارکونکی ووژل سول.

په چاودنه کې د همدې ادارې ۶ خبریالان زخمیان سوي دي.

دا پېښه په کابل کې د امریکا سفارت او د بخښنې نړیوال سازمان هم په شدت غندلې ده.

د خورشید ټلوېزیون مسئول محمد رفیع رفیق صدیقي پرون له کورنیو رسنیو ته په خبرو کې وویل چې پر همکارانو یې تروریستي برید سوی دی.

صدیقي زیاته کړه: “متاسفانه، په یوه تروریستي حمله کې زموږ دوه همکاران وژل سوي چې یو میر وحید شاه زموږ د اقتصادي چارو خبریال او بل زموږ تخنیکي همکار شفیق امیري وو، زموږ ۶ خبریالان زخمیان سوي دي.

د افغانستان د ولسمشر مرستیال ویاند دوا خان مینه‌پال
د افغانستان د ولسمشر مرستیال ویاند دوا خان مینه‌پال

د افغانستان د ولسمشر مرستیال ویاند، دوا خان مینه‌پال پرون رسنیو ته وویل چې حکومت دا حمله په شدت غندي.

مینه‌پال وویل چې د پېښې په اړه څېړنې کېږي.

دی وویل: “د وروستي برید په اړه د څېړنې لپاره امنیتي ادارو ته سپارښتنه سوې، د بیان ازادي د افغانستان حکومت یوه لویه لاس ته راوړنه ګڼي او د دې لاس ته راوړنې او د رسنیو د کارکونکو خوندیتوب خپل مسئولیت ګڼي.”

وسله‌والو طالبانو په پېښه کې لاس لرل رد کړی دی.

د پېښې مسئولیت لا کوم ډلې نه‌دی اخیستی.

په کابل کې د امریکا د متحده ایالاتو سفارت هم دا پېښه په شدت غندلې ده.

د سفارت په لنډ بیان کې چې پر توېټر خپور شوی، لیکل سوي چې پر رسنیو برید د افغانستان پر ازادۍ او پرمختګ برید دی.

ورته لیکنی

Back to top button
Close
Close